Xirho xa Palamende xa ANC Ponani Makhubele u paluxile makungu ya yena yo teka magoza ya nawu eka vandla leri fumaka eka leswi a vulaka leswaku i ku kanganyisa nxaxamelo wa vahlawuriwa va tiko.
Makhubele, loyi a humaka eka rhavi ra vandla ra ANC ra Bongi Mabunda eGiyani, u byerile Capricorn news leswaku u henhla leswaku vandla ri susile vito ra yena eka nxaxamelo wo sungula.
“Vito ra mina ekusunguleni a ri vekiwile eka 100 yo sungula eka nxaxamelo kambe endzhaku ka sweswo ri hundziseriwe eka 114, kasi sweswi ri hundziseriwa eka nxaxamelo wa 124 handle ko hlamuseriwa,” ku vula Ponani Makhubele.
Makhubele u hlamusela leswaku , u zamile Matshalatshala yo lava ku hlamuseriwa kusuka eka tihofisi ta nkoka ta vandla ra ANC, ku katsa na hofisi ya Matsalanankulu, Hofisi ya Phuresidente ya ANC, komiti ya nhlawulo ya ANC, na mufambisi wa nhlawulo ku sukela hi Dzivamisoko kambe a nga kumangi nhlamulo yo khomeka.
Vandla ra ANC, loko ri hlamula eka swivilelo leswi, ri amukerile vukona bya swihehlo mayelana na ku onhiwa ka nxaxamelo wa vandla naswona ri vule leswaku vulavisisi bya ha ya emahlweni eka nkarhi wa sweswi.
A hi ro sungula Makhubele a hlangana na mintlhontlho yo tano. U hlamusela mintokoto yo fana hi nkarhi wa nhlawulo wa 2016 na 2019, a ringanyeta xivumbeko lexi tlakusaka swivutiso mayelana na vutshembeki bya maendlelo ya vandla yo hlawula vahlawuriwa.
Mpfilumpfilu lowu yaka emahlweni exikarhi ka Makhubele na ANC wu kombisa timhaka to anama ta vulawuri bya le ndzeni na ku lulama endzeni ka matimba lama fumaka ya tipolitiki ya Afrika-Dzonga.
Loko Makhubele a ri karhi a tilulamisela ku yisa swivilelo swa yena ekhoto, mbuyelo wa mpfilumpfilu lowu wu nga va na switandzhaku leswikulu eka ku cinca-cinca ka ANC endzeni ka rona.
