Eka mhangu yo chavisa leyi nga tsekatsekisa vaaki va muganga wa ka Xitlhelani, ehandle ka Malamulele, xinhwanyetana xa khume nharhu xa malembe hi vukhale xi pfinyiwe hi tihanyi hi muhlaseri loyi a nga tiviwiki hi madyambu ya ti 4 ta Mudyaxihi 2024.
Xiyenge xa madzolonga ya le mindyangwini, nsirhelelo wa vana, na milandzu ya swa masangu eGiyani u sungurile ku lavisisa lokukulu ka muehleketeleriwa hi xikongomelo xo khoma muendli wa xiendlo lexi ehubyeni.
Hi ku ya hi swiviko leswi amukeriweke hi maphorisa, muhlaseriwa lontsongo a a vuya ekaya a huma exitolo xa le kusuhi loko a hlaseriwa hi muehleketeleriwa. “A hlomile hi mukwana, muhlaseri u xungetile xinhwanyetana lexi kutani a n’wi koka hi nkani a n’wi nghenisa ekhwatini ra le kusuhi laha a nga ya emahlweni a endla xiendlo xo nyenyetsa,” ku vula Muvulavuleri wa Maphorisa eLimpopo Brigadier Hlulani Mashaba.
“Muhlaseriwa u yile ekaya kambe a chava ku vika mhangu leyi eka manana wa yena ku fikela hi Ravunharhu, 08 May 2024. Hi ku hatlisa u yise n’wana wa yena wa nhwanyana exibedlhele naswona u tlhele a lemukisa maphorisa hi mhangu leyi,” ku vula Brigadier Mashaba
Mashaba u yile emahlweni a vula leswaku, Nandzu wo pfinya wu pfuriwile, naswona vulavisisi byi ya emahlweni.
Maphorisa ya kombele mani na mani loyi a nga na vuxokoxoko mayelana na vugevenga kumbe laha muehleketeleriwa a nga kona ku ta emahlweni a ta pfuneta eka vulavisisi.
“Vito ra muehleketeleriwa a ri tiveki eka nkarhi lowu, kambe Maphorisa ya tirha hi matimba ku n’wi hlata leswaku a ta pfaleliwa,” ku gimeta Mashaba.
