Musina – Vandla ra uMkhonto weSizwe (MK) ri hehle vandla ra African National Congress (ANC) hi ku hirimuxa (Davulela) no tumbeta tiphositara ta vona ta nhlawulo eMusina. Ku vikiwa leswaku tiphositara to tala ta vandla ra MK Party ti onhiwile kumbe ku funengetiwa hi tiphositara leti humaka eka mavandla man’wana.
Matsalana wa xifundzhakulu xa Limpopo wa ANC Reuben Madadzhe u bakanyele etlhelo swihehlo leswi, a swi vula leswaku i matshalatshala yo lava nyingiso (attention). “A hi susangi tiphositara ta vandla ra MK Party, hi nga susa njhani tiphositara ta vandla leri nga tsandzeka ku va na minhlangano yinharhu yo gangisela tivhoti exifundzhenikulu lexi,” ku vula Madadzhe.
Loko Madadzhe a ya emahlweni u vurile leswaku, “hi hina hi Swi tiveka ngopfu leswaku tiphositara ta hina ta ANC ti susiwa siku na siku, kambe a hi si tshama hi endla huwa hi mhaka leyi.”
Cambridge Hlungwani, mutirhela mfumo wo huma eka vandla ra MK Party, u hehle varhangeri va ndhuma va ANC eMusina hi ku lerisa ku herisiwa ka tiphositara ta vona. “Ku vile na khandziyiso wa Meyara wa Musina [Godfrey Mawela] hi yexe a khutaza swirho swa vandla ra ANC eka nhlengeletano ku hisa kumbe ku susa xin’wana na xin’wana lexi fambelanaka na MK, ku katsa na President Jacob Zuma. Wolawo i marito ya Meyara wa Masipala wa Musina a kha a byela swirho swa ANC ku endla swiendlo leswi,” ku hlamusela Hlungwani.
Muofisiri wa nhlawulo wa xifundzhakulu xa Limpopo Nkaro Mateta u tiyisisile ku amukela xivilelo lexi. “Hi amukerile swiviko mayelana na ku susiwa ka tiphositara. Hi kombela mi xiya leswaku i nandzu ku rhurhela kumbe ku susa tiphositara ta mavandla ya tipolitiki,
” Hi endlile malunghiselelo na SALGA na timasipala. Leswi hi faneleke ku swi endla i ku xixima milawu ya timasipala.” Ku vula Mateta.
Loko Mateta a khari a gimeta u vurile leswaku, Ku hava vandla kumbe munhu loyi a pfumeleriwaka ku onha kumbe ku susa tiphositara ta mavandla man’wana.
