Maphorisa ya Limpopo ya khomile mune wa vavanuna, ku katsa na vaakatiko vambirhi va matiko mambe, mayelana na ku ehleketeleriwa ku va, va yivile chrome na switirhisiwa swa migodi leswi nga riki enawini. Ku khomiwa loku ku humelerile hi Musumbhunuku eGa Mathabatha Mabowe Park exifundzhenintsongo xa Capricorn.
Maphorisa ya lemukisiwile hi lori yo basa ya Volvo leyi nga na ti “registration plate” ta Gauteng, leyi ehleketeleriwa ku layicha chrome eMabowe Park.
Maphorisa ya tsutsumele endhawini ya mhangu kambe ya vone lori yi chayela yi kongoma eLeporogong Cross hi patu ra R37.
Kuvikiwa leswaku, Loko maphorisa ya ringeta ku yimisa lori, muchayeri u ngeterile rivilo, leswi endleke leswaku maphorisa ya sungula ku nwi hlongorisa ku fika va yanwi khoma eMashite Cross.
Maphorisa ya kume switirhisiwa swa migodi leswi nga riki enawini na mali ya R40,000 endzeni ka lori. Vulavisisi byi endle leswaku ku khomiwa vaehleketeleriwa van’wana vambirhi.
