Vandla ra Economic Freedom Fighters (EFF) eLimpopo va vika leswaku madzolonga ya humelerile eJujuValley hi Sonto exikarhi ka swirho swa ANC na vaaki va ndhawu liya, ku vula vandla.
Mikhandziyiso leyi hangalakeke eka swihangalasamahungu swa le ka social media yi kombisa mintlawa yimbirhi, yin’wana yi ambale swikipa swa ANC kasi yin’wana yi ambale swikipa swo tshwuka swa EFF, yi ri karhi yi hoxetelana hi maribye hi nkarhi wa pfhumba wo gangisa tivhoti.
Maphorisa ya tiyisisile leswaku swirho swa vandla ra ANC na EFF swi hehliwa hi ku banana hi maribye, naswona ku duvuriwile swibamu swo hlaya. “N’wana wa malembe ya 9 hi vukhale na wanuna wa makume mbirhi ntlhanu wa malembe hi vukhale va vavisekile eka ku holova loku,” ku vula Maphorisa.
Godrich Gardee, muhlanganisi wa xifundzhakulu xa EFF, u komberile maphorisa na khomixini ya nhlawulo ku lavisisa mhangu leyi ku kumisisa xivangelo xa madzolonga lawa.
Gardee u tlhele a kombela swirho na varhangeri va EFF ku papalata ku hlohlotela loku nga kavanyetaka nhlawulo lowu taka.
U kandziyisile ku tinyiketela ka vandla eka endlelo ra nhlawulo ro rhula, leri lulameke, na xidemokirasi.
