Maphorisa ya Limpopo ya lerisiwile ku tirha hi rivilo ku khoma vaehleketeleriwa vambirhi lava balekeke endhawini ya vuhlayiselo bya Maphorisa eSaselamani hi Ravumune leri nga hundza.
Hi Sonto, maphorisa ya khomile un’wana wa vabaleki eka lava vanharhu, Dumisani Respect Chauke wa malembe ya makume nharhu mbirhi hi vukhale, loyi a langutaneke na milandzu yimbirhi yo hlasela hi xikongomelo xo vavisa.
Ku hehliwa leswaku vaehleketeleriwa va balekile hi le henhla ka muako , naswona vulavisisi bya swiyimo leswi rhendzeleke mhangu leyi bya ha ya emahlweni.
Khomixinara wa maphorisa ya xifundzhakulu Lieutenant General Thembi Hadebe u komberile vaaki ku nyika swiletelo swihi na swihi leswinene ku tiyisisa ku kota ku khomiwa nakambe ka vabaleki lava vambirhi lava saleke, Mikateko Ronald Chauke na Jimmy Matirhele.
Vaehleketeleriwa hinkwavo a va rindzerile ku tengisiwa loko vata baleka.
