Lebowakgomo – Maphorisa eLebowakgomo, exifundzheni xa Capricorn, ya le ku laveni ka Mahlaela Patrick, mubohiwa loyi a rindzeleke ku tengisiwa, u balekile ekhotsweni ra le nawini.
Mubohiwa loyi wa malembe ya 37 hi vukhale a a ya ekhoto ya Thabamoopo hi ti 20 ta May 2024, a langutane na swihehlo swo tika, ku katsa na milandzu ya mune yo pfinya na milandzu yimbirhi yo phanga na swiyimo swo tika.
Muvulavuleri wa Maphorisa eLimpopo Colonel Malesela Ledwaba u boxile leswaku, ” Patrick a ri xirho xa ntlawa lowu nga pfinya vanhwanyana vanharhu hi lembe ra 2015 emugangeni wa Seruleng na hi lembe ra 2016 eByldrift”.
“Nandzu wa ku baleka ekhotsweni leri nga enawini, wu ta engeteriwa eka nxaxamelo wa yena wa milandzu,” ku vula Colonel Ledwaba.
Swiviko swi paluxa leswaku, Ku hava munhu loyi a vikiweke ku va a vavisekile hi nkarhi wa ku baleka ka mubohiwa Patrick, kambe ku baleka ka yena ku le ku lavisisiweni hi Maphorisa.
Lieutenant General Thembi Hadebe, Khomixinara wa Xifundzakulu wa Maphorisa ya Afrika Dzonga eLimpopo, u komberile ntlawa wa vahloti lavakulu eMaphoriseni ku kuma Patrick na ku lavisisa leswaku u swi kotise ku yini ku baleka.
“Maphorisa ya kombela un’wana na un’wana loyi a nga na vuxokoxoko bya laha Patrick a nga kona ku tihlanganisa na xitichi xa maphorisa xa le kusuhi na yena hi xihatla,” ku gimeta Colonel Ledwaba.
Vaaki va tsundzuxiwa leswaku va nga tshineli eka yena, tani hi leswi a tekiwaka a ri na khombo.
