Eka goza ra xivindzi leri nga pfuxa njhekanjhekisano no pfuxa njhekanjhekisano lowukulu, Muvulavuleri wa vandla ra MK Party, Nhlamulo Ndhlela, u kombele vaseketeri va vandla leswaku va vhota hi xintalo leswaku vandla rita kuma vunyingi bya mbirhi – nharhu (two – thirds Majority) nhlawulo lowu taka.
Loko a vulavula eka Muteki wa Mahungu wa NewzAfrika endzhaku ka xiboho xa khoto ya vumbiwa eka Jacob Zuma, Ndhlela u kandziyisile nkoka wo kuma switulu swo ringanela swa palamende ku cinca vumbiwa, leswi nga ta pfulela Zuma ndlela ya ku vuya ematimbeni.
Marito ya Muvulavuleri wa MK Party ya tlakusile tinsiva naswona ya koke ku soriwa ku suka eka matlhelo yo hambana, laha vo tala va kanakana swikongomelo swa vandla na switandzhaku swa goza ro tano ro cinca vumbiwa.
Vaaki van’wana va vula leswaku, vandla ri lava ku onha vumbiwa hi mhaka ya ku lava ku amukela munhu un’we, leswi humesa xikombiso lexi nga ni khombo naswona swi tekela ehansi misinya ya milawu ya xidemokirasi ni ku fuma ka nawu laha tikweni.
Kambe vaseketeri va vandla ra MK Party va hlengeletanile endzhaku ka xirhambo xa Ndhlela, va xi languta tani hi goza ra maqhinga ro lulamisa leswi va swi vonaka tani hi ku pfumaleka ka vululami eka murhangeri wa vandla Jacob Zuma.
Va vula leswaku Zuma, munhu loyi a Phandisaka vanhu tinhloko eka tipolitiki ta Afrika-Dzonga, u faneriwa hi nkarhi lowu faneleke wo rhangela rixaka nakambe na leswaku maendlelo ya nawu ya sweswi ya hlohleteriwa hi van’watipolitiki kuri ndlela yo lwisana na yena.
Loko tiko ri ri karhi ri tilulamisela nhlawulo wa nkoka, xirhambo xa Vandla ra MK Party xi engetela xiyimo lexintshwa eka xiyimo xa tipolitiki lexi se xi nga na matimba.
