Bolobedu – Maphorisa ya sungurile ku hlota lokukulu ka vaehleketeleriwa lava katsekaka eka ku duvuriwa ka wansati wa 56 wa malembe hi vukhale na n’wana wa yena wa 40 wa malembe hi vukhale hi Sonto, May 19, 2024, eShawela Village.
Mhangu leyi yi humelerile kwalomu ka awara ya tsevu nimixo, Maphorisa ya tsutsumele endhawini ya mhangu endzhaku ka ku lumiwa ndleve hi mhangu leyi.
Muvulavuleri wa Maphorisa eLimpopo Colonel Malesela Ledwaba, u boxile leswaku ” Loko Maphorisa ya fika lani mhangu yi nga humelela kona ya kumile muhlaseriwa wa xinuna a etlele exidziveni xa ngati endzeni ka yindlu, a ri ni swilondza swo tala swa swibamu.”
“Vukorhokeri bya swa Vutshunguri bya Xihatla byi vitaniwile laha kunga na mhangu kambe byi paluxile leswaku Muhlaseriwa u hundzile emisaveni endhawini ya mhangu,” ku vula Colonel Ledwaba.
Kasi swiviko swin’wana swi paluxe leswaku wansati loyi na yena a duvuriweke hi nkarhi wa mhangu leyi, u tsutsumerisiwile exibedlhele kambe na yena u lovile hikwalaho ka ku vaviseka ka yena.
“Vulavisisi byo sungula byi kombisa leswaku vaehleketeleriwa lava nga tivekiki va gongondze egedeni ya ndhawu yo tshama ya wanuna loyi wa malembe ya 40 hi vukhale,
“Loko a hlamula, ku ve ni njhekanjhekisano lowukulu. Mana wakwe u humile ehandle leswaku a ya lavisisa, kutani ku twala swibamu. Muhlaseriwa wa xinuna u balekile endzeni ka yindlu loko a nga se wa,” ku vula Ledwaba.
Tata wakwe wa malembe ya 63 hi vukhale u himile hi ku tsutsuma lani a nga kume nsati wakwe a ri na swilondza swa xibalesa, naswona endzhakunyana u yisiwe exibedlhele, laha a nga fikiwa leswaku u hundzile emisaveni.
Nsusumeto wa nhlaselo lowu wa tihanyi a wu tiveki tani hi leswi maphorisa ya yaka emahlweni na vulavisisi bya wona.
