Meyara wa Masipala wa Xifundzhatsongo xa Mopani, Pule Shayi, u andlale voko ro pfuneta eka ndyangu wa Mikateko Khosa loyi a tshamaka eka Ngove ehandle ka le Giyani, hi ku va nyika ximfumo yindlu ya makamara manharhu yo etlela leyi nga na swilo hinkwaswo hi Ravunharhu.
Khosa a tshama endlwini ya kamara rin’we ni vana vakwe vanharhu, naswona loko a amukela yindlu leyi Mikateko u phofule mintlhontlho ya ku tshama endlwini yin’we na mativula yakwe, ya mufana wa malembe ya 15 hi vukhale.
Leswi ndyangu lowu a wu titshege ntsena hi mali yo seketela vana ya mudede, Mikateko u kandziyise xilaveko xo kuma ntirho leswaku a ta kota ku hlayisa vana va yena ni ku lawula muti lowuntshwa lowu a wu kumeke.
“Tanihi leswi hi hanyaka hi mali ya mudede, swi lava leswaku ndzi yima hi milenge ndzi lava ntirho leswaku ndzi ta kota ku hlayisa vana va mina,” ku vula Mikateko Khosa a kha a byela Capricorn news.
Ku hoxa xandla hi ku hanana ku suka eka masipala swi tisa ntshembo na ku ntshunxeka eka ndyangu wa ka Khosa, wu va nyika nkarhi wo antswisa swiyimo swa vutomi na ku tshamiseka.
Loko Mikateko a ri karhi a veka mahlo ya yena eka swivandlanene swa mintirho swa laha kaya, vaaki va hlengeletana endzhaku ka yena, va phindha matitwelo ya vun’we na nseketelo hi nkarhi wa ku nyiketiwa ka yindlu leyi hi meyara.
