Maphorisa ya ka Malamulele ya sungurile ku hlota vaehleketeleriwa hi xitalo lava nga na vutihlamuleri eka ku phanga loku katsaka swibamu eMugangeni wa Jim Jones.
Mhangu leyi yi humelerile hi Musumbhunuku, Hukuri 6, 2023, kwalomu ka 9:30 nivusiku.
Kuya hi xitatimende lexi humaka eka muvulavuleri wa maphorisa ya Limpopo Hlulani Mashaba, un’wana wa vahlaseriwa u vikile leswaku a va tlanga makariti loko mune wa vavanuna lava hlomeke va nghena eka ndzhawu leyi a va ri eka yona .
Ku vikiwa leswaku Vaehleketeleriwa va koxile mali, loko va nga se baleka na ntsengo wa mali leyi nga tivekiki, xikan’we na swilotlelo swa movha, kutani va baleka hi movha wa muhlaseriwa.
Endzhaku ka sweswo, movha lowu yiviweke wu kumiwile wu tshikiwile ekusuhi na muganga wa Mahonisi.