Maphorisa eLimpopo ya vula leswaku OperationKukula yi ya emahlweni yi humesa mbuyelo lowunene, eku siveleleni ka migingiriko ya vugevenga exifundzhenikulu lexi xa Limpopo.
Maphorisa ya vula leswi enzhaku ka loko va kotile ku khoma Kwalamu ka 1275 wa vaehleketeleriwa exikarhi ka ti 29 ta Nhlangula na ti 5 ta Hukuri 2023.
Vaehleketeleriwa va khomiwile eka vugevenga byo hambana hambana lebyi katsaka ku dlaya, ku phanga, ku pfinya na milandzu yin’wana ya ku xanisa hi swa masangu na vugevenga byi n’wanyana.
Muvulavuleri wa maphorisa ya xifundzhakulu Brigadier Hlulani Mashaba u vula leswaku swipano swo hambana hambana swi endlile matshalatshala yo lemukisa vugevenga, leswi swi katsa ku pfariwa ka magondzo, ku kambela ku landzelela milawu, tindhawu to kambela mimovha, ku yima na ku secha, ku endzela swikolo, na swin’wana.
U vula leswaku migingiriko leyi yi endliwile eka swifundzhatsongo swa ntlhanu swa xifundzhakulu xa Limpopo naswona hikwalaho ka sweswo, swibamu leswi nga riki enawini leswi nga na swibalesa na nhundzu ya vuxisi ku katsa na fole, swidzidziharisi, byalwa, mabanga na mimovha leyi yiviweke swi tekiwile.
