Nongonoko wa drama ya Vatsonga eka SABC, Giyani Land of Blood, ku hehliwa leswaku wu herisiwile, leswi siyeke vaseketeri va wona va ri eka xiyimo xo ka xi nga tsakisi.
Mahungu lawa ya pfuxe mpfilumpfilu wa mintlhaveko yo hambanahambana exikarhi ka vahlaleri, laha van’wana va kombiseke ku vilela kasi van’wana va tshama va ri na ntshembo wa ku siku rin’wana xitorhi lexi xi ta vuya.
Un’wana wa vatlangi va nongonoko lowu, Fumani ‘Vukosi Moya’ Shilubana, u tsarile eka swiyenge swa mabulo, a vula leswaku ” I ku hela ka nguva ntsena naswona nongonoko lowu wu ta vuya nakambe karhi lowu taka”.
Hambiswiritano, kuya hi mbhoni ya hina leyo tshembeka yi kombisile leswaku hakunene lawa ma nga ha va makumu yo hetelela ya xitorhi lexi.
Giyani Land of Blood, leyi a yi kongomisiwile eka rixaka ra Vatsonga, yi hlanganile na mintlhontlhlo ya ku soriwa ku sukela loko xi sungurile ku tlanga eka makomba-kule.
Loko vahlaleri van’wana va bumabumerile nongonoko lowu hi ku kombisa ntiyiso wa ndhavuko wa Vatsonga, van’wana va vona a va nga tsakisiwi hi swirin’wana leswi a swi tirhisiwa eka ntlangu lowu, loko van’wana va sola swinene vantlangi lava a va hoxa xiave eka ntlangu lowu.
Ku herisiwa ka ntlangu lowu, swi ta tanihi ku biwa eka vaseketeri va yona lava wu rhandzaka, naswona lava landzeleleke minkwetlembetano hinkwayo leyi humelelaka eka swimunhuhatwa ku sukela loko Giyani – Land of Blood yi sungula hi lembe ra 2021.
Hambi leswi ku amukela swi nga oloviki, Giyani Land of Blood handle ko kanakana yi nyikile pulatifomo eka vatlangi lava nga na vuswikoti, ku fana na Fumani Shilubana, Wiseman Zitha, Ndivhuho Mutsila, Obed Baloyi,Rami Chuene, Charles Baloyi hambi kuri Solly Makamu ku kombisa vutshila bya vona naswona yi voningele ndzhaka leyi fuweke ya ndhavuko wa vaaki lava vulavulaka Xitsonga, Sepedi na Tshivenda.
Giyani Land of Blood yi kombisile vuswikoti bya swimunhuhatwa swa Vatsonga notlhela yi pfula tinyangwa ta vona eka indasitiri ya Makomba-kule ya Afrika-Dzonga.
Loko hi ri karhi hi lelana na Giyani Land of Blood, a hi anakanyisiseni hi nkucetelo lowu wu nga va na wona na mabulo lawa ya nga maendla siku na siku. Hambi yi vuya kumbe e-e, vukona na ndzhaka bya yona byi ta ya emahlweni byi hlohlotela no vumba vumundzuku bya thelevhixini ya Afrika-Dzonga.
Hi marito ya Fumani Shilubana, “Ku fana na malembe man’wana, minkarhi hinkwayo a yi fika emakumu naswona endzhaka ka karhi a yi vuya nakambe.”
Kumbexana, ku fana na ntumbuluko wa xirhendzevutani xa vutomi, Giyani Land of Blood yi ta kuma ndlela ya yona yo tlhela yi vuya eka swikirini swa hina swa tithelevhixini, yi tisa switori leswintshwa nakambe.
